बिराजसँग किक सिकें, निरुतालाई भेट्ने मन छ

दीपक विष्ट, तेक्वान्डो खेलाडी
फिल्मको फाइट हेरेर नै मलाई मार्शल आर्ट खेल्ने चाहना बढेको हो । त्यसैले फिल्ममा 'एक्सन' नै मनपर्छ । आजकल फिल्ममा मार्शल आर्टलाई कसरी प्रयोग गरिएको छ, त्यो हेर्न मन लाग्छ । सानो छँदा नेपाली फिल्म बढी हेरिन्थ्यो । अहिले भने अलि कम हेरिन्छ । नेपालमा पनि एक्सन फिल्म बढी चल्छ भन्ने सुनेको छु । तर ती फिल्म 'रियल' लाग्दैनन् ।


बिराज भट्टसँग मेरो राम्रो चिनजान छ । हाम्रो गाउँ पनि सँगै हो । धनगढीको रैकवार विचवामा हुर्केकाले हामी भेट हुँदा थारु भाषामा कुरा गर्छौ । उनी म भन्दा सिनियर खेलाडी हुन् । फिल्म खेल्नुअघि पनि मार्सल आर्टमा उनी कहलिएका थिए । उनी निकै राम्रो किक हान्छन् । मलाई पनि उनले किक हान्न सिकाएका छन् ।



उनका केही फिल्म हेरेको छु । अहिले त निकै चलेका कलाकार हुन् । यो सब उनको एक्सनको कमाल हो । 'दादागिरी' भन्ने फिल्ममा उनले भालुसँग फाइट खेलेको निकै मनपर्यो । फिल्मको सुटिङ त मैले हेरेको छैन । तर, पर्दामा बिराजको फाइट लोभलाग्दो देखिन्छ । मार्सल आर्टको दृष्टिकोणवाट पनि त्यो पूर्ण छ ।

अहिलेका हिरोइनहरूमा रेखा थापाको निकै चर्चा सुनिन्छ । तर, मलाई चर्चाबाट हराएकी अभिनेत्री निरुता सिंह मनपर्छ । 'दर्पणछायाँ' हेरेपछि म उनको फ्यान भएको हुँ । त्यसपछि पनि निरुताका धेरै फिल्म हेरेँ । उनको अभिनय एकदमै जीवन्त हुन्छ । अहिले त उनको फिल्म त्यति आएका छैनन् । यस्तो राम्रो कलाकारले काममा निरन्तरता दिएको राम्रो हुन्थ्यो । तर, उनी किन हराएकी हुन् । मलाई उनीसँग भेटेरै चिनजान गर्ने धोको थियो तर पुरा भएको छैन । अहिले त आफू पनि ब्यस्त भइन्छ । कुनै दिन भेट भयो भने खुलेर प्रशंसा गर्ने सोचमा छु ।